O MAY, THY MORN
O MAY, thy morn was ne'er sae sweet,
As the mirk night o' December;
For sparkling was the rosy wine,
And private was the chamber;
And dear was she I dare na name,
But I will aye remember!
And here's to them, that, like oursel,
Can push about the jorum !
And here's to them that wish us weel-
May a' that's guid watch o'er them!
And here's to them we dare na tell,
The dearest o' the quorum!
DOG THE DADDIE O'T
O, WHA my babie-clouts will buy?
Wha will tent me when I cry?
Wha will kiss me whare I lie?-
The rantin dog the daddie o't!
Wha will own he did the faut?
Wha will buy the groanin maut?
Wha will tell me how to ca't?-
The rantin dog the daddie o't!
When I mount the creepie-chair,
Wha will sit beside me there?
Gie me Rob, I seek nae mair-
The rantin dog the daddie o't!
Wha will crack to me my lane?
Wha will mak me fidgin fain?
Wha will kiss me o'er again?—
The rantin dog the daddie o't!
YESTREEN I had a pint o' wine,
A place where body saw na';
Yestreen lay on this breast o' mine
The gowden locks of Anna.
The hungry Jew in wilderness
Rejoicing o'er his manna
Was naething to my hinny bliss
Upon the lips of Anna.
Ye monarchs, tak the east and west,
Frae Indus to Savannah !
Gie me within my straining grasp
The melting form of Anna :
There I'll despise imperial charms,
An Empress or Sultana,
While dying raptures in her arms
I give and take with Anna!
Awa, thou flaunting god o' day!
Awa, thou pale Diana!
Ilk star, gae hide thy twinkling ray,
When I'm to meet my Anna!
Come, in thy raven plumage, night,
Sun, moon, and stars withdrawn a',
And bring an angel pen to write
My transports wi' my Anna!
The kirk and state may join, and tell
To do such things I maunna:
The kirk and state may gae to hell,
And I'll gae to my Anna!
She is the sunshine o' my ee,
To live but her I canna.
Had I on earth but wishes three,
The first should be my Anna.
Corn rigs, an' barley rigs,
An' corn rigs are bonie:
I'll ne'er forget that happy night,
Amang the rigs wi' Annie.
IT was upon a Lammas night,
When corn rigs are bonie,
Beneath the moon's unclouded light
I held awa to Annie.
The time flew by wi' tentless heed,
Till, 'tween the late and early,
Wi' sma' persuasion she agreed
To see me thro' the barley.
The sky was blue, the wind was still,
The moon was shining clearly;
I set her down wi' right good will,
Amang the rigs o' barley.
I kent her heart was a' my ain;
I lov'd her most sincerely;
I kiss'd her owre and owre again
Amang the rigs o' barley.
I lock'd her in my fond embrace,
Her heart was beating rarely:
My blessings on that happy place,
Amang the rigs o' barley!
But, by the moon and stars so bright
That shone that hour so clearly,
She ay shall bless that happy night
Amang the rigs o' barley!
I hae been blythe wi' comrades dear,
I hae been merry drinking,
I hae been joyfu' gath'rin gear,
I hae been happy thinking:
But a' the pleasures e'er I saw,
Tho' three times doubl'd fairly,
That happy night was worth them a',
Amang the rigs o' barley.
THERE's nought but care on ev'ry han',
In every hour that passes, 0:
What signifies the life o' man,
An' 'twere na for the lasses, O?
The warly race may riches chase,
An' riches still may fly them, O,
An' tho' at last they catch them fast,
Their hearts can ne'er enjoy them, O ;
But gie me a canny hour at e'en,
My arms about my dearie, O,
An' warly cares, an' warly men,
May a' gae tapsalteerie, O!
For you sae douce, ye sneer at this,
Ye're nought but senseless asses, 0 :
The wisest man the warl' saw,
He dearly lov'd the lasses, O!
Auld Nature swears, the lovely dears
Her noblest work she classes, 0:
Her prentice han' she tried on man,
And then she made the lasses, O.
Green grow the rashes, O!
Green grow the rashes, O!
The sweetest hours that e'er I spend,
Are spent amang the lasses, Ö!
AULD LANG SYNE
For auld lang syne, my dear,
For auld lang syne,
We'll tak a cup o' kindness yet
For auld lang syne.
SHOULD auld acquaintance be forgot,
And never brought to min'?
Should auld acquaintance be forgot,
And days o' lang syne?
We twa hae rin about the braes,
And pu'd the gowans fine;
But we've wandered monie a weary foot
Sin auld lang syne.
We twa hae paidl't i' the burn,
Frae mornin sun till dine;
But seas between us braid hae roar'd
Sin auld lang syne.
And here's a hand, my trusty fiere,
And gie's a hand o' thine,
And we'll tak a right guid-willie waught
For auld lang syne!
And surely ye'll be your pint-stowp,
And surely I'll be mine!
And we'll tak a cup o' kindness yet
For auld lang syne!
For auld lang syne, my dear,
For auld lang syne,
We'll tak a cup o' kindness yet
For auld lang syne.
HAUGHTY GAUL
DOES haughty Gaul invasion threat?
Then let the loons beware, Sir,
There's wooden walls upon our seas,
And volunteers on shore, Sir.
|