HYMNUS 49.

VICTIS sibi cognomina Sumant Tyranni gentibus: Tu, Christe, quanto dignius Ab his capis quos liberas!

Non alterum mortalibus Ægris quod invocent datum, Resurgerent quo mortui, Perenne per quod viverent.

Tanti quod illi constitit,
Toto quod emptum sanguine
Nostro ne rursus crimine
Insana gens delebimus?

Sacro pati pro nomine

Summi sit instar muneris:
Amara non mors amplius,
Fit mors per hoc amabilis.

Tu qui vocari sustines
Jesu, salus mortalium,

Audi vocantes nos, tuo
Qui gloriamur nomine.

Qui natus es de Virgine,
Jesu, tibi sit gloria,

Cum Patre, cumque Spiritu,
In sempiterna secula.

HYMNUS 50.

VERBUM quod ante secula
Sinu paterno nasceris,
Recens homo sub tempore
E virginis prodis sinu.

Jam dura discis perpeti
Quæ ferre par sontes fuit:
Orbis saluti, fletibus
Præludis in cunis puer.

Fis pauper, indigentiâ
Nos et tuâ detescimus:
Luges, tuis et lacrymis
Totum lavas mundi scelus.

Pannis opertus vilibus

Lates, recumbens in specu: Homo, superbis, et Deum Panni, specus, non dedecent?

A Patre missus, perditi

Qui factus es mundi salus,

Jesu, perire ne sinas

Tot quos emis laboribus.

Qui natus es de Virgine,

Jesu, tibi sit gloria,

Cum Patre, cumque Spiritu, In sempiterna secula.

HYMNUS 51.

DIVINE crescebas Puer,
Crescendo discebas mori,

Hæc destinata tunc erant
Mortis tuæ præludia.

Satus Deo, volens tegi,
Elegit obscurum Patrem;
Qui fecit æternis domos,
Domo latet sub paupere.

Cœlum manus quæ sustinent
Fabrile contrectant opus:
Supremus astrorum Parens
Fit ipse vilis artifex.

Tremenda cujus præpetes
Mandata portant Spiritus,
Cui pronus orbis subditur,
Se sponte fabro subjicit.

Qui natus es de Virgine,
Jesu, tibi sit gloria,

Cum Patre, cumque Spiritu,
In sempiterna secula.

HYMNTS 52

CHRISTUS tenebris obsitan Lustrando Judæam docet: Gens obstinato pectore Christum docentem respuit.

Sese Deum signis probat;
Surgunt sepulcris corpora:
Erepta muto vox redit,
Claudo gradus, cæco dies.

Gens dura, flecti nescia,
Aures sacris sermonibus
Obturat, et solem fugit,
Amore noctis perdita.

Nos lumen ambimus, Patris
In quo refulget claritas:
Ne mentibus subrepere
Tetram sinas caliginem.

Nunquam recedas a piis
Lux sempiterna cordibus;
Te veritate fulgeant,
Te caritate ferveant.

Qui natus es de Virgine

Jesu, tibi sit gloria,

Cum Patre, cumque Spiritu. In sempiterna secula.

HYMNUS 53.

QUE stella sole pulcrior
Coruscat? hæc Regis novi
Revelat ortus: hæc Dei
Præsignat ad cunas iter.

Stat vatibus priscis fides,
En Stella surgit ex Jacob:
Arrectus ad spectaculum
Eous orbis emicat.

Dum sidus admonet foris,
Lux fulget intus clarior:
Suadetque vi blandâ magos
Signi datorem quærere.

Segnes amor nescit moras:
Labor, pericla, nil movent;
Domum, propinquos, patriam
Deo vocante, deserunt.

Micante dum nos allicis,
Oh Christe, Stellâ gratiæ,
Ne tarda cœlesti sinas
Obstare corda lumini.

Qui lumen est, sit laus Patri
Qui se revelat gentibus,
Sit laus Patri, laus Filio,

Par sit tibi laus, Spiritus.